Errefortzu dosia ematen hasiko dira 18 urtetik gorakoei

Jon Irizar Aranguren 2022ko urt. 13a, 14:34

Osasun Publikoaren Batzordeak 40 urtez azpiko herritarrei hirugarren dosia jartzeko erabakia hartu du gaur goizean, baita bigarren eta hirugarren dosiaren arteko tartea sei hilabetetik hirura laburtzea ere. Horrez gain, Osasun Sailak txertaketa datuak eguneratu ditu. EAEko herritarren %48,9ak jaso du dagoeneko hirugarren edo errefortzu dosia; %90,5ak 60 urtetik gorakoen artean. Parekoa da 5-11 urte arteko haurren lehen dosia jaso dutenen datua: %48,6a.

Espainiako Osasun Ministerioko eta erkidegoetako ordezkariak biltzen dituen Osasun Publikoaren Batzordea bildu da gaur. Carolina Darias Espainiako Osasun ministroak bilera ostean egin duen agerraldian bi erabaki berri eman ditu jakitera. Alde batetik, 40 urtez azpiko herritarrei hirugarren dosia jarriko zaiela baieztatu du; txertaketa kanpaina osoan egin bezala, adin-taldeka emango dira ziztadak, zaharrenetatik gazteenetara. Bestetik, bigarren eta hirugarren dosien arteko denbora tartea sei hilabetetik hirura laburtzea erabaki du batzordeak.

Ia erdiak

Bestalde, gaur eguneratu ditu Osasun Sailak txertaketa kanpainaren inguruko datuak, eta bi datu adierazgarri daude besteen gainetik. Lehena, 12 urtetik gorako EAEko herritarren ia erdiak (%48,9ak, zehazki) hirugarren edo errefortzu dosia jaso izana; bigarrena, berriz, 5 eta 11 urte arteko haurren ia erdiak (%48,6ak, zehazki) birusaren aurkako txertoaren lehen ziztada jaso izana. Bi erregistroak ia 4 puntuan hazi dira azken hiru egunetan.

Aldaketa gutxi

Aipatutakoez gain, datu orokorrei so eginez gero apenas egon da aldaketarik azken egunetan. Biztanleria osoa aintzat hartuta, %0,1ean hazi dira gutxienez dosi bat edota immunizazio osoa duten herritarren ehunekoak. Errefortzu dosiari dagokionez, 60 urtetik gorakoen artean 10 herritarretatik 9k jaso dute jada hirugarren ziztada (%90,5).

Adin-taldea Dosi bat gutxienez Immunizazio osoa Errefortzu dosia
>= 100 urte %95,8 %95,0 -
90-99 urte %93,7 %93,7 %96,4
80-89 urte %97,7 %97,3 %93,6
70-79 urte %96,4 %96,4 %94,5
60-69 urte %95,2 %95,2 %85,3
50-59 urte %95,7 %94,4 %26,5
40-49 urte %92,9 %92,0 -
30-39 urte %87,3 %85,2 -
20-29 urte %85,4 %83,0 -
16-19 urte %93,4 %91,1 -
12-15 urte %97,1 %92,7 -
5-11 urte %48,6 %6,2 -
GUZTIRA %93,1 %91,9 %48,9

 

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak